‘బిగ్ హిట్టర్’తో పాటు ముగ్గురు స్టార్‌లపై చెన్నై

- బుర్ర బద్దలయ్యే వ్యూహంతో వేలానికి సిద్ధం

చెన్నై, నవంబర్ 20 :
ఐపీఎల్ 2026 మినీ వేలం దగ్గరపడుతున్న కొద్దీ, చెన్నై సూపర్ కింగ్స్ భారీ మార్పులతో సంచలనాన్ని సృష్టిస్తోంది. డిసెంబర్ 16న అబుదాబిలో జరగనున్న ఈ వేలం కోసం సీఎస్‌కే పూర్తిస్థాయి వ్యూహరచనతో ముందుకు వచ్చేసింది. జట్టులో ఇటీవల చోటుచేసుకున్న కీలక మార్పులు – రవీంద్ర జడేజా, సామ్ కరన్‌లను రాజస్థాన్‌కు అప్పగించి సంజూ శాంసన్‌ను జట్టులోకి తీసుకోవడం – ఇప్పటికే హాట్ టాపిక్‌గా మారాయి. పైగా రవిచంద్రన్ అశ్విన్ రిటైర్మెంట్ ప్రకటించడంతో జట్టులో భారీ ఖాళీలు ఏర్పడ్డాయి. ఇదే సమయంలో సీఎస్‌కే వద్ద రూ. 43.4 కోట్ల భారీ పర్స్ ఉండటంతో, ఈ వేలంలో ఎవరికీ తగ్గకుండా బిడ్లు వేసేందుకు సిద్ధమైందని జట్టు వర్గాలు చెబుతున్నాయి.
ఈ నేపథ్యంలో చెన్నై ప్రధానంగా నలుగురు కీలక ఆటగాళ్లను లక్ష్యంగా పెట్టుకుంది. వీరిలో మొదటివాడు, అభిమానుల్ని కుర్చీలమీదికి ఎగిరేలా చేసే విధ్వంసక హిట్టర్ ఆండ్రీ రస్సెల్. కోల్‌కతా జట్టు అతన్ని విడుదల చేయడంతో, సీఎస్‌కే ఇప్పుడు సామ్ కరన్ స్థానం భర్తీ చేసే ఆఫర్‌గా అతడిపైనే దృష్టి పెట్టింది. దిగువ క్రమంలో భారీ షాట్లు, చివరి ఓవర్లలో వేగవంతమైన బౌలింగ్ – ఇవన్నీ రస్సెల్ ప్రత్యేకతలు. సీఎస్‌కే స్కౌట్ ఏఆర్ శ్రీకాంత్ తాజాగా చేసిన పరోక్ష పోస్టులు కూడా రస్సెల్‌పై ఆసక్తిని మరింత బలపరుస్తున్నాయి. రస్సెల్ దొరకకపోతే కామెరూన్ గ్రీన్ ప్రత్యామ్నాయంగా ఉండనున్నాడు.
స్పిన్ విభాగంలో నూర్ అహ్మద్‌కు జతగా మరో నాణ్యమైన స్పిన్నర్ అవసరాన్ని కూడా సీఎస్‌కే బలంగా గుర్తిస్తోంది. ఈ స్థానం కోసం రవి బిష్ణోయ్ లేదా రాహుల్ చాహర్ పేర్లు జట్టు హుందాలో ఉన్నాయి. ముఖ్యంగా చెపాక్‌లోని తిరుగుబాటు పిచ్‌లను చూసుకుంటే, రాహుల్ చాహర్ బౌలింగ్ అనుకూలంగా ఉంటుందని విశ్లేషకుల అభిప్రాయం.
పేస్ విభాగంలో మతీషా పతిరణ ఖాళీని భర్తీ చేయడం చెన్నైకు అత్యంత కీలక అజెండాగా మారింది. ఈ నేపధ్యంలో గెరాల్డ్ కోయిట్జీ పేరే ముందంజలో ఉంది. అతని వేగం, బలం, డెత్‌ఓవర్లలో క్రమబద్ధత – జట్టుకు భారీ ప్లస్ అవుతాయని భావిస్తున్నారు. అవసరమైతే లుంగి ఎంగిడి, మోహిత్ శర్మ, ఆకాశ్ దీప్ వంటి ప్రత్యామ్నాయాలపై కూడా దృష్టి పెట్టవచ్చు. ముఖ్యంగా పతిరణను తిరిగి దక్కించుకోవాలనే ప్రయత్నం కూడా చేసేది చెన్నైకే.
ఓపెనింగ్‌లో అనుభవజ్ఞుడైన విదేశీ బ్యాటర్ అవసరాన్ని గుర్తించిన సీఎస్‌కే, గతంలో జట్టుకి ఎన్నో విజయాలు అందించిన ఫాఫ్ డు ప్లెసిస్ లేదా మరో ప్రత్యామ్నాయం క్వింటన్ డి కాక్ వైపు కూడా చూడనుంది. రుతురాజ్ గైక్వాడ్‌తో జోడీగా ఓపెనింగ్‌ను స్థిరపరిచే వీరిలో ఎవరైనా జట్టులో చేరితే, బ్యాటింగ్ విభాగం మరింత బలపడుతుంది.
ఇక సీఎస్‌కే విడుదల చేసిన ఆటగాళ్ల జాబితా, రిటైన్ చేసిన ఆటగాళ్ల జాబితా చూస్తే జట్టులో చోటుచేసుకున్న భారీ మార్పులు స్పష్టమవుతాయి. ఈ సారి చెన్నై వేలానికి అనుకున్నదానికంటే ఎక్కువ దూకుడుతో, ఊహించని బిడ్లు వేస్తుందనే అభిప్రాయం కూడా వ్యక్తమవుతోంది.