రాజు వెడ్స్‌ రాంబాయి.. హార్డ్-హిట్టింగ్ క్లైమాక్స్‌తో హృద్యమైన ప్రేమకథ

వరంగల్‌, నవంబర్‌ 2 :
వేణు ఊడుగుల షోరన్నర్‌గా ఉన్న సినిమా అనగానే అంచనాలు సహజంగానే పెరుగుతాయి. ‘నీది నాది ఒకే కథ’, ‘విరాట పర్వం’లతో ఆయన తనదైన ముద్ర వేసుకున్నాడు. ఆయన సమర్పణలో వచ్చిన ‘రాజు వెడ్స్‌ రాంబాయి’ కూడా అదే స్థాయిలో ఆసక్తిని రేపింది. ముఖ్యంగా చివరి భాగంలో వచ్చే ప్రీక్లైమాక్స్‌, క్లైమాక్స్ సన్నివేశాలు సినిమాకు ప్రధాన బలంగా నిలిచాయి.

తెలంగాణ రాష్ట్ర ఏర్పాటుకు ముందు వరంగల్‌–ఖమ్మం ప్రాంతాల నేపథ్యంతో సాగే కథ ఇది. బ్యాండ్ వాయిద్యాల్లో దిట్ట అయిన రాజు (అఖిల్ రాజ్) తనే గ్రామానికి చెందిన రాంబాయి (తేజస్విని రావ్)ను ప్రేమిస్తాడు. ఆమె తండ్రి వెంకన్న (చైతన్య జొన్నలగడ్డ) మాత్రం కూతురికి ప్రభుత్వ ఉద్యోగం ఉన్న కుర్రాడినే పెళ్లి చేయాలని పట్టుదలగా ఉంటాడు. ఈ నేపథ్యంలో రాజు–రాంబాయి తీసుకున్న నిర్ణయం… దాన్ని అడ్డుకోవడానికి వెంకన్న చేసే ప్రయత్నాలు… ఆ తర్వాత జరిగే సంఘటనలే సినిమా కథ.

ఈ చిత్రం హానర్ కిల్లింగ్ నేపథ్యంతో సాగుతుంది. నేరుగా హత్య లేదు కానీ భావోద్వేగాల పరంగా గట్టి షాక్ ఇచ్చే క్లైమాక్స్‌ను దర్శకుడు తెరకెక్కించాడు. మొదటి భాగంలో ప్రేమ, స్నేహితుల కామెడీ ట్రాక్, గ్రామీణ వాతావరణం బాగానే వర్కౌట్ అయ్యాయి. ఇంటర్వెల్ సీన్ ఆకట్టుకుంటుంది. రెండో భాగంలో కొద్దిగా నెమ్మదనం ఉన్నా, చివరి అరగంటలో వచ్చే సన్నివేశాలు ఆ లోటు కనిపించకుండా చేస్తాయి.
నటనలో అఖిల్ రాజ్ రాజు పాత్రలో ఎనర్జిటిక్‌గా, ఎమోషనల్‌గా మెప్పించాడు.
తేజస్విని రావ్ రాంబాయి పాత్రలో తెలంగాణ యాసతో సహజంగా నటించింది.
చైతన్య జొన్నలగడ్డ వెంకన్న పాత్రలో డిఫరెంట్ విలనిజం పండించాడు.
ఫ్రెండ్స్ గ్యాంగ్‌లో డాంబర్ పాత్ర నవ్వులు పూయిస్తుంది.
సాంకేతికంగా చూస్తే సురేశ్ బొబ్బిలి సంగీతం సినిమాకు పెద్ద బలం. నేపథ్య సంగీతం అనేక కీలక సీన్స్‌ను బాగా ఎలివేట్ చేసింది. సినిమాటోగ్రఫీ, నిర్మాణ విలువలు సహజంగా కుదిరాయి. డైలాగ్స్ కూడా సహజంగా, గ్రామీణ టచ్‌తో ఉన్నాయి.
మొత్తంగా ఇది మాస్ సినిమా కాదు… కానీ హృదయానికి దగ్గరగా లాక్కెళ్లే రియలిస్టిక్ ప్రేమకథ. బలమైన క్లైమాక్స్ ఇష్టపడే ప్రేక్షకులకు ‘రాజు వెడ్స్‌ రాంబాయి’ మంచి అనుభూతిని ఇస్తుంది.